ՆԵԽՈԻՐ - ՔԱՐԱՎՈՒԶ - ԿԱՐՈՍ - СЕЛЬДЕРЕЙ

Երկամյա խոտաբույս է, պատկանում է նեխուրազգիների ընտանիքին: Ցողունն ուղղաձիգ է, ունի 1-1,5 մ բարձրություն, խիստ ճյուղավորված է: Տերևները փայլուն են, մուգ կանաչ, սրածայր եզրերով, իսկ տերևիկները կլոր են, եռաժանի: Ծաղիկները փոքր են, կանաչավուն, առանց բաժակի, հավաքված են բազմաթիվ փոքր հովանոցներում` 6- 12 ճառագայթներով, ունեն հինգ ծաղկաթերթեր, հինգ առէջ, հինգ վարսանդ: Պտուղը ձվաձև է, ունի երկու մմ երկարություն: Նեխուրը ծաղկում է հուլիս-օգոստոս ամիսներին:
Քիմիական բաղադրությունը: Նեխուրի արմատը պարունակում է եթերային յուղ, խոլին, ասպարագին, մանտին, պենտոզանին, լորձանյութեր, օսլա: Պտուղը պարունակում է եթերային յուղ: Օգտագործման եղանակը: Բժշկության մեջ օգտագործել են նեխուրի արմատները, սերմերը և տերևները:
Նեխուրի արմատը բուլղարական բժշկության մեջ օգտագործում են երիկամների կծիկախտի (նեֆրիտ), եղնջացավի, մաշկաբորբերի, ախորժակի բացակայության, վատ մարսողության, սեռական թուլության, շագանակագեղձի բորբոքման և հոդատապի բուժման համար: Հայկական բժշկության մեջ նեխուրն օգտագործվել է տեսողության վատւսցման, գլխացավի, բերանի տհաճ հոտի, կրծքագեղձի բորբոքային ուռուցքների, որովայնի խիթքի, ործկալու, ճիճվակրության, երիկամների բորբոքումների, միզաքարային հիվանդության, ընկերքի դուրս բերման, սեռական թուլության, եղնջացավի, հոդատապի, շագանակագեղձի բորբոքման բուժման համար:
Ամիրդովլաթ Ամասիացին նեխուրի սերմը մեղրի հետ միասին օգտագործել է լյարդի և երիկամների բորբոքային հիվանդությունների, դաշտանի խանգարման, ճիճվակրության, միզակապության բուժման համար, իսկ նեխուրի արմատը, զուգակցելով այլ դեղաբույսերի հետ, օգտագործել է սակավարյունությունը բուժելու համար:
Գերմանական բժշկության մեջ նեխուրն օգտագործվել է երիկամների կենսագործունեության խանգարման, հոգնածության, հոդատապի և արյան մաքրման բուժման համար:
1. Կանաչ նեխուրը ծեծել և դնել աչքին` տեսողության վատացման և գլխացավի բուժման համար:
2. Նեխուրի արմատն աղալ, քամել և ստացված մզվածքից օրը 3 անգամ 50-ական գ խմել` բերանի վատ հոտի, զկոտալու, երիկամների բորբոքային հիվանդությունների, միզաքարային հիվանդության և որովայնի խիթքի բուժման համար: Այդ նույն մզվածքը կարելի է օգտագործել թրջոցների ձևով` կրծքագեղձի բորբոքային ուռուցքների բուժման համար:
3. 100 գ նեխուրի արմատը ծեծել, վրան ավելացնել 50 գ մեղր, լավ խառնել և օրը 3 անգամ 1-ական ճաշի գդալ ուտել` սեռական թուլության, եղինջացւսվի, ախորժակի բացակայության, միզակապության, երիկամային կծիկախտի շագանակագեղձի բորբոքման բուժման համար:
4. 100 գ նեխուրի սերմը ծեծել, ավելացնել 100 գ մեղր, լավ խառնել և օրը 3 անգամ 1-ական ճաշի գդալ ուտել` լյարդի և երիկամների բորբոքային հիվանդությունների, դաշտանի խանգարման, ճիճվակրության բուժման համար:
Ըստ Ամիրդովլաթի, նեխուրի հակաթույնը մեղրը, գինեթթուն և խնձորաթթուն են: