ԼԱՅՆԱՏԵՐԵՎՈՒԿ - ՕՐՀՆԱՓՈՒՇ - ВОЛЧЕЦ КУДРЯВЫЙ

Միամյա կամ բազմամյա խոտաբույս է, պատկանում է աստղածաղկազգիների ընտանիքին: Բույսն ունի ծռմռված, ճյուղավորված ցողուն: Տերևները երկարավուն են, համարյա բոլորը նստադիր, ալիքաձև կամ փետրաճեղքավոր, խոշոր, բավականին կոշտ ջղիկներով, որոնք առաջացնում են ցանց: Ամբողջ բույսը խոնարհված է: Զամբյուղները շրջապատված վերևի տերևներով: Զամբյուղի ներսային պատիճի տերևիկները վերջանում են սրածայր փշով: Զամբյուղի դրսային պատիճի տերևիկները խոշոր են և նույնպես վերջանում են փշով: Զաբյուղի հատակը ծածկած է ժապավենաձև ծաղկատերևով: Պտուղները գլանաձև են, փուփուլավոր: Փուփուլները կազմված են 8-10 ատամնավոր մազմզուկներից և բազմաթիվ կարճ մազերից: Լայնատերևուկը ծաղկում է հուլիս ամսից սկսած:
Քիմիական բաղադրությանը: Լայնատերևուկը պարունակում է դառը գլյուկոզիդային նյութ` կնիցին, լորձ, տանիններ, խեժանյութեր, ոչ մեծ քանակությամբ նիկոտինամիդ:
Օգտագործման եղանակը: Բժշկության մեջ օգտագործել են լայնատերևուկի տերևները, ծաղիկները և ցողունի վերևի մասը:
Բուլղարական բժշկության մեջ լայնատերևուկն օգտագործել են աղեստամոքսային ուղու խոցերի, աղեփքանքի, փորկապության, սրտխփոցի, սակավարյունության, շնչառական օրգանների բուժման համար:
Հայկական բժշկության մեջ լայնատերևուկն օգտագործել են շնչառական օրգանների բորբոքային հիվանդությունների, քրոնիկ փորկապության, թոքային խողովակահեղձուկի, դեղնախտի, սրտխփոցի, ստամոքսաղիքային ուղու խոցերի, դաշտանի խանգարումների և սակավարյունության բուժման համար:
1. Աղալ 15 գ լայնատերևուկի տերև, ավելացնել 0,5 լ եռացրած ջուր, թողնել 30 րոպե, ապա քամել և օրը 3 անգամ 100-ական գ խմել` թոքային խողովակաԻեղձուկի, դեղնախտի, սակավարյունության, սրտխփոցի, ստամոքսաղիքային ուղու խոցերի և դաշտանի խանգարումների բուժման համար: